Օգնության է հասնում բնաբուժությունը

— Երեխաս 14 տարեկան է, ունի էկզեմա, ենթաստամոքսային գեղձի բորբոքում (պանկրեատիտ) եւ բերանից տհաճ հոտ է գալիս: Ի՞նչ ժողովրդական միջոցներ կարող եք խորհուրդ տալ: Մշտ. ընթ. Երեւանից

Երեխան միաժամանակ տառապում է մի քանի հիվանդությունից: Այս դեպքում պետք է առանձին-առանձին ուսումնասիրել հիվանդությունների դեմ պայքարի եղանակներն ու միջոցները:
Նախ՝ անդրադառնանք էկզեմա հիվանդությանը
Էկզեման սուր եւ քրոնիկական ընթացող, կրկնվող մաշկային հիվանդություն է: Այն կազմում է մաշկային հիվանդությունների 30-40%:
Հիմնականում առաջանում է նյարդային եւ ներզատիչ  համակարգերի խանգարումների, որեւէ ալերգենի հանդեպ օրգանիզմի գերզգայուն վիճակը պահպանող քրոնիկական վարակի օջախների, օրինակ՝ նշագեղձերի բորբոքման առկայության, աղեստամոքսային համակարգի եւ այլ հիվանդությունների դեպքերում: Այն նկատվում է նաեւ էքսուդատիվ դիաթեզ ունեցող երեխաների մոտ: Էկզեմայի ժամանակ այտուցված կարմիր մաշկի վրա առաջանում են տարբեր բնույթի ցաներ՝ թափանցիկ պարունակությամբ բշտիկներ: Դրանց պատռվելուց գոյանում են մանր թաց հատվածներ, միմյանց ձուլված վարդագույն հանգուցիկներ,  առաջանում է սաստիկ քոր եւ անհանգստություն:
Մաշկը թեփոտվում է, առաջանում են ճաքեր, որոնք հետագայում կեղեւակալում եւ  ցավ են պատճառում:

Էկզեմայի դեպքում ժողովրդական  բժշկությունն առաջարկում է

Վերցնել եռագույն մանուշակ, տատրակի տերեւներ, խատուտիկի տերեւներ, նիվենու տերեւներ, կղմուխ, գիհու արմատներ, լորենու ծաղիկներ, ասեղնատերեւներ՝ հավասար քանակությամբ: Հավաքածուն մանրացնել, վերածել փոշու եւ խառնուրդից վերցնել 7 գրամ, ավելացնել 450մլ եռման ջուր, եռացնել 3 րոպե, թրմել 1,5 ժամ, ընդունել տաք վիճակում 1/3-1/4-ական բաժակ, օրական 3-4 անգամ, ուտելուց 20 րոպե հետո:

Վերցնել ձիաձետ, մոշի տերեւներ, դաշտային խորդենի, հապալասի ընձյուղներ, կղմուխ, եղինջի տերեւներ՝ հավասար քանակությամբ: Խառնուրդից վերցնել 4 գրամ, ավելացնել 350 մլ եռման ջուր, թրմել տաք տեղում 1 ժամ եւ օգտագործել տաք վիճակում, ուտելուց հետո:

Ենթաստամոքսային գեղձը խոշոր մարսողական գեղձ է: Այս գեղձի ներզատական գործունեությունը հիմնականում  կապված է ինսուլինի եւ խաղողաշաքարի արտադրման հետ: Ենթաստամոքսային գեղձի ֆունկցիան  խանգարվում է նրա բորբոքումների ժամանակ, որը լինում է սուր եւ  քրոնիկական բնույթի:
Ապացուցված է, որ ենթաստամոքսային գեղձի  սուր բորբոքումը պատահում է լեղուղիներով հիվանդների մոտ, հատկապես լեղաքարային հիվանդությունների ժամանակ:
Ենթաստամոքսային գեղձի  սուր բորբոքումը կապված է նաեւ մեծ քանակությամբ ճարպային սննդի ընդունման հետ, սակայն հիվանդության զարգացման գործում մեծ դեր ունի   նյարդաանոթային գործոնը, քանի որ ենթաստամոքսային գեղձը շատ  զգայուն է նրանում կատարվող արյան մատակարարման նկատմամբ, ալերգիկ վիճակների,  վնասվածքնների եւ հատկապես մեծաքանակ ճարպային, կծու, թթու, մսային սննդի ընդունման եւ վարակիչ, թունավոր ու այլ գործոնների առկայության նկատմամբ: Հիվանդության  բուժման համար կարեւոր է հետեւել սննդակարգին:

Ենթաստամոքսային գեղձի  բորբոքման դեպքում ժողովրդական բժշկությունն առաջարկում է

Վերցնել կեչու տերեւներ, կատվախոտի արմատներ, մատիտեղ  թռչնոց, սրոհունդ, վաղենակի  ծաղիկներ, եղինջ, պղպեղադաղձ, երիցուկի ծաղիկներ՝  հավասար քանակությամբ: Այս հավաքածուից վերցնել 15 գրամ, ավելացնել 0,5 լիտր  եռման ջուր, 8 ժամ թրմել թերմոսում եւ ընդունել տաք  վիճակում, օրական 4 անգամ, 0,5-ական բաժակ, ուտելուց հետո, եւ  0,5-1 բաժակ՝ քնելուց առաջ:

Վերցնել անմեռուկի ծաղիկներ, մատիտեղ թռչնոց, սրոհունդ, խատուտիկի  արմատներ, դառը օշինդր, մասուրի պտուղներ,  տարկավան, կռատուկի արմատներ, սովորական ծորենի՝ հավասար  քանակությամբ:  Պատրաստել եւ օգտագործել նախորդ բաղադրատոմսի նման:
Բուժման տեւողությունը 2 ամիս է, կարելի է այդ ընթացքում հերթափոխել  այս բաղադրատոմսերի ընդունումը, քանի որ արդյունավետությունն անհատական բնույթ ունի:

Սովորաբար բերանից տհաճհոտ առաջանում է բերանի խոռոչի լորձաթաղանթի, լնդերի, ատամների, աղեստամոքսային, ներզատիչ համակարգի հիվանդությունների դեպքում: Ուստի բերանի տհաճ հոտը կարող է այն հիվանդությունների հետեւանք լինել, որոնցից տառապում է Ձեր երեխան:

Այժմ Ձեզ ներկայացնում ենք այն միջոցները, որոնք կարող են պայքարել բերանի տհաճ հոտի դեմ:

Բուժման համար օգտագործում են մաղադանոսի հյութը, վիտամին C,  խորհուրդ է տրվում նաեւ սրոհունդի եփուկը կամ թուրմը՝ որպես  հակաբորբոքային եւ  մանրէասպան, հյուսվածքները վերականգնող միջոց:

1 ճաշի գդալ սրոհունդի վրա լցնել 1 բաժակ եռացրած ջուր, թրմել,  հովացնել եւ օգտագործել բերանը ողողելու համար:

Արդյունավետ է օգտագործել բաղեղի եփուկը: Վերցնել 2 ճաշի գդալ բաղեղի չորացրած, մանրացրած  ցողուններ, ավելացնել  2 բաժակ ջուր, թեթեւակի եռացնել  եւ օգտագործել բերանի ողողումների համար:

Խորհուրդ է տրվում օգտագործել նռան կեղեւի, եղեսպակի թուրմը կամ եփուկը ողողումների  համար,  օգտակար է  նաեւ  շիբը:

Եղեսպակի եփուկ. վերցնել 4 թեյի գդալ մանրացրած եղեսպակի տերեւներ, ավելացնել 2 բաժակ  ջուր, եռացնել եւ օգտագործել բերանի ու կոկորդի  ողողումների համար:

Օգտակար է նաեւ ողողումների համար օգտագործել կաղնու կեղեւի եփուկը: Կարելի է նաեւ կաղինը եփել եւ ուտել  փափկացված վիճակում:

Եթե բերանից տհաճ հոտ է գալիս, արյունահոսում են լնդերը, ապա խորհուրդ է տրվում օրական 2  անգամ բերանը ողողել ոսկեբեղիկի հյութով կամ լնդերը մերսել  ոսկեբեղիկի յուղով: