Աղջկա դեմք
Առողջություն եվ գեղեցկություն,  Փորձագետի խորհուրդներ

Ինչո՞ւ են դեմքին լաքաներ առաջանում

Մայիսի 29, 2015

— Դեմքիս վրա առաջացել են մուգ լաքաներ: Կցանկանայի իմանալ՝ ինչի՞ հետ են կապված: Առհասարակ ի՞նչն է պատճառը, ո՞ւմ դիմել եւ ինչպե՞ս կատարել բուժումը:
Մարգարիտ

Վերջին ժամանակներում գեղեցիկ սեռի միջին տարիքի ներկայացուցիչները հաճախ են բախվում դեմքի վրա առաջացած մուգ լաքաների խնդրի հետ: Դա կարող է լինել արեւի տակ շատ մնալուց, տարբեր քսուքներ եւ կրեմներ օգտագործելուց, ինչպես նաեւ  կապված լինել ներքին օրգանների հիվանդությունների հետ:
Փորձելով պարզել նման բծերի առաջացման պատճառները եւ փոքր-ինչ օգտակար լինել մեր ընթերցողին՝ դիմեցինք  թերապեւտ Լաուրա Համբարձումյանին:

Վաճառվում է ՆԻՇԱՍՏԱ
Հեռ.՝ 091-517207

-Հարգելի՛  բժշկուհի, մեր ընթերցողի դեմքին առաջացել են մուգ բծեր: Որո՞նք են դրանց առաջացման պատճառները:
-Ցանկացած հիվանդության պատճառն իմանալու համար անհրաժեշտ է կատարել խորը բժշկական հետազոտություն: Դեմքի վրա առաջացած մուգ լաքաները կարող են ունենալ տարբեր պատճառներ: Որպես թերապեւտ կարող եմ պարզապես ենթադրել, որ նման երեւույթներ կարող են առաջանալ նաեւ լյարդի գործունեության խանգարումից: Սակայն նման դեպքերում անհրաժեշտ է, որ հիվանդը դիմի մաշկավեներոլոգի, ով էլ կկատարի մանրազնին հետազոտություն եւ կպարզի պատճառը:
Լսելով թերապեւտի խորհուրդը՝ դիմեցինք մաշկավեներոլոգ Կարեն Հովհաննիսյանին:

-Պարո՛ն Հովհաննիսյան, մեր խմբագրություն դիմած ընթերցողի դեմքի վրա առաջացել են մուգ բծեր, ինչի՞ հետ է դա կապված:
-Դեմքի վրա առաջացած մուգ բծերը կոչվում են խլոազմաներ: Խլոազման արտահայտվում է դեմքի մաշկի վրա դեղնաշագանակագույն լաքաների ձեւով, որոնք առաջանում են հիմնականում կանանց մոտ՝ հղիության ընթացքում, դաշտանային ցիկլի խանգարումների ժամանակ (օրինակ՝ կապված ձվարանների ֆունկցիայի խանգարման հետ), հակաբեղմնավորիչ պատրաստուկների ընդունման դեպքում, սեռական օրգանների բորբոքային հիվանդությունների ժամանակ: Խլոազմաների տիպի արտահայտումներ կարող են ի հայտ գալ նաեւ մակերիկամների, հիպոֆիզի, վահանագեղձի պաթոլոգիաների ժամանակ, լյարդի հիվանդությունների դեպքում, արեւի տակ երկար գտնվելուց, տարատեսակ քսուքներ ու կրեմներ օգտագործելուց:

-Ինչպե՞ս  է այս դեպքում իրականացվում բուժումը:
-Պատճառի կամ նպաստող գործոնների վերացման դեպքում լաքաները կարող են անհետանալ, սակայն որոշ դեպքերում դրանք կրում են կայուն բնույթ եւ դժվարությամբ են ենթարկվում տարբեր մեթոդներով բուժման: Դեմքի լաքաների վերացումը կատարվում է մի քանի ձեւերով: Բժշկի խորհրդով եւ հսկողությամբ իրականացվում է հակագունակային թերապիա հիմնականում 2 ուղղություններով՝

1) Վերնամաշկի արտաքին շերտի պոկումը (կլպումը), որից հետո նոր առաջացող բջիջներում գունակների քանակը սովորաբար ավելի քիչ է լինում:

2)  Սպիտակեցնող միջոցների օգտագործում: Հատկապես հաճախ խորհուրդ են տրվում սալիցիլաթթվի պատրաստուկներ (հատկապես յուղոտ մաշկի դեպքում). 20%-անոց սալիցիլային սպիրտով մերսում են մաշկը մի քանի օր՝ օրը 3-10 անգամ, մինչեւ մաշկը դառնում է չոր, կնճռոտ եւ հիշեցնում է մագաղաթ: Հետո համապատասխան հատվածների վրա 15-20 րոպե դնում են 2%-անոց սպիտակ սնդիկի քսուք (2օր), որից հետո ընդունում են գոլորշիով շոգեբաղնիք (դեմքի), պինցետի օգնությամբ հեռացնում են արտաքին եղջերային շերտը (պոկվող), քսում են սառեցնող քսուք: Բայց այս ամենը կատարվում է միայն բժշկի նշանակմամբ եւ հսկողությամբ:

-Բժի՛շկ, ի՞նչ խորհուրդ կտաք մեր  ընթերցողներին:
-Նախ՝ ասեմ, որ նման իրավիճակում հայտնված հիվանդն առանց վարանելու պետք է դիմի մաշկավեներոլոգի: Լաբորատոր հետազոտությունից հետո միայն հնարավոր է պարզել լաքաների առաջացման պատճառը: Դրանից հետո միայն իրականացվում է բուժումը:
Իսկ մյուս ընթերցողներին խորհուրդ կտամ հետեւողական լինել առողջության նկատմամբ, զգուշությամբ օգտագործել այն զանազան քսուքները, որոնք մեր օրերում գովազդվում են տարբեր ընկերությունների կողմից: Միշտ հիշե՛ք, որ դրանց պատճառով կարող եք Ձեր նուրբ ու գեղեցիկ մաշկի վրա թողնել անդառնալի հետքեր:

Հեղինակ՝ Մանե Դավթյան

Կիսվել
Tweet
Pin
Կիսվել

Հարակից նյութեր

Ֆիբրոադենոմա
Պայքար ֆիբրոադենոմայի դեմ
Հուլիսի 7, 2014
Դեմքի դիմակ
Ինչպե՞ս խնամել մաշկը բնական միջոցներով
Ապրիլի 24, 2013
Մաշկի համար
Գեղեցիկ մաշկի գաղտնիքը
Հունվարի 15, 2020

48 մեկնաբանույթուն

Թողնել պատասխան

Ձեր էլ-փոստի հասցեն չի հրապարակվելու։ Այն նշելը անհրաժեշտ է հետագայում ավելի արագ մեկնաբանություն թողնելու համար։