Սնկերը գրոհում են

— Խնդրում եմ գրել լեզվի եւ կոկորդի սնկային հիվանդությունների, ժողովրդական միջոցներով  դրանց բուժման մասին:
Մշտ. ընթ. Երեւանից

Լեզվի վրա կարող են հայտնաբերվել ամենատարբեր հիվանդություններ, այդ թվում նաեւ՝  սնկային: Սնկային հիվանդություններից ամենահայտնին շողասնկախտն (ակտինոմիկոզ) է: Շողասնկախտի հարուցիչը ճառագայթասունկն է, որը հանդես է գալիս 2 ձեւերով՝ անաէրոբ եւ աէրոբ: Մարդու համար պաթոգեն է համարվում այն սունկը, որը սովորաբար սապրոֆիտ է դառնում բերանի խոռոչում եւ մարսողական ուղու մնացած հատվածներում: Դիմածնոտային կամ դիմային ձեւերը կազմում են  բոլոր ձեւերի  80%-ը: Շողասնկախտը պատկանում է ալերգիզացիա առաջացնող հիվանդությունների թվին: Կոկորդը պատկանում է պարանոցային օրգանների թվին, վահանա-լեզվային թաղանթաձեւ կապանի շնորհիվ կախված է ենթալեզվային ոսկրից, սահմանակից է կերակրափողի վերին մասին, ուստի լեզվի հիվանդություններն ըստ շարունակության կարող են անցնել կոկորդին:

Կոկորդի շողասնկախտի դեպքում ռենտգենաբանական հետազոտության ժամանակ նկատվում են հաստացումներ կոկորդի հատվածում: Նկատվում է աստիճանաբար զարգացող ընդհանուր թուլություն, աշխատունակության անկում, նյարդային երեւույթներ, անքնություն: Մարմնի ջերմաստիճանն իջնում է մինչեւ 35-36 ⁰C: Մաշկի պիգմենտացիան փոխվում է:

Շողասնկախտի  բուժումը

Բուժման նպատակով բժշկի նշանակմամբ նշանակում են կաթիլային ներարկումներ, տալիս են ընդհանուր խթանիչներ:

Ժողովրդական բաղադրատոմսեր

Ժողովրդական բժշկությունը խորհուրդ է տալիս վերցնել հավասար քանակությամբ անիսոնի պտուղներ, կեչու տերեւներ, սրոհունդ, եղինջ, հովվապարկ, տատրակի տերեւներ, ձիաձետ, վաղենակ, չիչխան, ծնեբեկ:

Այս ամենը խառնել, խառնուրդից վերցնել 10 գրամ, ավելացնել 300մլ եռացրած ջուր, տաքացնել ջրային բաղնիքում 15 րոպե, այնուհետեւ 3 ժամ թրմել, հովացնել, քամել, ընդունել գոլ վիճակում 1/3, 1/4-ական բաժակ, օրական 3-4 անգամ, ուտելուց 30 րոպե առաջ:

Լավ արդյունք է տալիս թեյասնկի 1.5-ական բաժակ օգտագործումը օրական 2 անգամ, ուտելուց 20 րոպե առաջ:

Սնկային հիվանդություններից բուժվելու ամենամատչելի մեթոդը խնձորի քացախի օգտագործումն է խմելու եղանակով: Անհրաժեշտ է 0,5 բաժակ ջրին ավելացնել 1-2 թ.գ. խնձորի քացախ եւ խմել ուտելուց հետո, օրական 2-3 անգամ:

Արդյունավետ են նաեւ ողողումները: Բերանի խոռոչը պետք է կանոնավոր ողողել կես բաժակ թեյասնկի թուրմով կամ կես բաժակ գոլ ջրին ավելացնել  1 ճ.գ. խնձորի քացախ եւ այդ լուծույթով ողողումներ կատարել ուտելուց հետո, օրական 32-4 անգամ:

Արտաքին օգտագործման համար դնել քացախի մեջ թաթախված թրջոց՝ այնքան, որքան մարդը կարող է դիմանալ:

Սնկային հիվանդությունը հարականջային ու պարանոցային հատվածում առաջացնում է ասեպտիկ ուռուցք, որը բավական  պինդ ու կարծր է: Բուժիչ նպատակով կատարում են նշված հատվածների ներարկում յոդային լուծույթներով 1:10, 1:100 հարաբերակցությամբ:
Շատ անգամ շողասնկախտը բարդանալով առաջացնում է տանջող ցավ, սակայն ավելի սաստիկ, քան տուբերկուլոզի ժամանակ: Ցավերն այնքան են ուժգնանում, որ երբեմն հիվանդը չի կարող տանել անգամ վերնաշապիկի առկայությունը մաշկի վրա:  Վարակը կարող է սրտի ախտավորման պատճառ դառնալ: Երբ ինֆիլտրատը ներծծվում է, առաջացնում է թարախային վարակ, սրտի քրոնիկական անբավարարություն եւ սրտի դեկոմպենսացնող արատներ: