Բժշկի մօտ
Տղամարդ եվ կին,  Փորձագետի խորհուրդներ

Հղիանալը դեռ մայրանալ չէ

Փետրվարի 11, 2015

— 5 շաբաթական հղիությունս վիժել եմ: Առաջին հղիությունս արհեստականորեն ընդհատել եմ, հնարավո՞ր է, որ վիժումը դրանից լինի, որքա՞ն ժամանակ հետո նորից կարող եմ հղիանալ:
Անի

Հղիությունը մի մեծ իրադարձություն է կնոջ  կյանքում, բայց որոշ դեպքերում արտաքին կամ  ներքին պատճառները կարող են խանգարել հղիության նորմալ  ընթացքը, վիժման պատճառ հանդիսանալ: Այս թեմայի շուրջ զրուցեցինք գինեկոլոգ Բոզոյան Սուսաննայի  հետ:

Վաճառվում է ՆԻՇԱՍՏԱ
Հեռ.՝ 091-517207

-Մեր ընթերցողը վիժել  է 5 շաբաթական պտուղը, իսկ դրան նախորդող առաջին հղիությունն ընդհատել է արհեստականորեն (աբորտ): Մի փոքր կպարզաբանե՞ք ինքնաբերական վիժում  եւ հղիության արհեստական ընդհատում երեւույթները:
-Հղիությունը ամուսնացած հայ կանանց  99 տոկոսի ցանկությունն է: Այն բարդ կենսաբանական գործընթաց է, որը  տեղի է ունենում բնության օրենքներին համապատասխան եւ  ավարտվում է ծննդաբերությամբ: Բայց որոշ դեպքերում արտաքին կամ  ներքին պատճառները կարող են խանգարել հղիության նորմալ  ընթացքը՝ առաջացնել ժամանակից շուտ պտղի դուրս մղում արգանդի խոռոչից, որը կոչվում է վիժում: Եթե դա պատահում է հղիության  մինչեւ 28-րդ շաբաթը, ապա ինքնաբերական վիժում է:
Վիժման  ամենատարածված պատճառներից է սաղմի ոչ նորմալ զարգացումը: Դա  անվանում են պտղաձվի առաջնային մահ: Այս դեպքում վիժումը  լինում է հղիության առաջին շաբաթներին, որի պատճառը  քրոմոսոմային խանգարումն է: Հղիության առաջին եռամսյակում վիժման  պատճառ կարող են լինել նաեւ արգանդի վզիկի անբավարարությունը,  տենդային որոշ վիճակները, հորմոնալ խանգարումները,  սրտի որոշ հիվանդությունները, արգանդի զարգացման  անկանոնությունները:
Հղիության արհեստական ընդհատումն արվում է կնոջ ցանկությամբ՝ կամավոր:  Հղիության կամավոր ընդհատումները Հայաստանում օրինականացվել են 1955 թ.,  սակայն այն թույլատրելի է մինչեւ հղիության 12-րդ շաբաթը:  Սրանից հետո սաղմն արդեն պտուղ է համարվում, եւ հղիությունը  կարող է ընդհատվել միայն բժշկական ցուցումներով:

-Ի՞նչ է կատարվում կնոջ օրգանիզմում  հղիության արհեստական ընդհատման  ժամանակ եւ հետո:
-Այդ ժամանակ ընդհատում են արդեն հղիությանը հարմարված կնոջ  օրգանիզմում զարգացող հղիությունը: Սկսվում է ըստ էության  աղետ, որը վերացնում է աճող պտղի եւ մոր օրգանիզմի միջեւ  «կարգավորված հարաբերությունը»: ՈՒստի զարմանալի չէ, որ մոր  օրգանիզմը հաճախ չի կարողանում հաղթահարել այդ  «ցնցումը»՝ առանց առողջությանը վնասելու: Հղիության  արհեստական ընդհատումը նույնպես նշանակում է օրգանիզմի  նյարդային եւ հորմոնալ կարգավորման խորը խանգարում:
Դա բերում է այն բանին, որ որոշ կանանց մոտ հղիության արհեստական ընդհատումից հետո կանոնավոր դաշտանային ցիկլը չի վերականգնվում: Այն հետո անկանոն է  դառնում, դաշտանը լինում է մեծ ուշացումներով, կամ, ընդհակառակը,  կարճատեւ ընդմիջումներով: Հղիության արհեստական ընդհատումից հետո  շատ-շատերի մոտ այդպես էլ չի հաջողվում կարգավորել խանգարված կանոնավոր դաշտանային ցիկլը, ժամանակից շուտ սկսվում է  կլիմաքսը, անսպասելի եւ արագ ճարպակալում են: Մեծ մասամբ  հղիության արհեստական ընդհատման թույլ հիմնավորված խնդրանքով դիմում են երիտասարդ  կանայք, որոնք չեն հասկանում, թե ինչ ռիսկի են դիմում  եւ տեղյակ չեն դրա  հետեւանքներին:

-Կոնկրետ այս դեպքի համար, հնարավո՞ր է, որ մեր ընթերցողի  վիժման պատճառը նախորդ հղիության ընդհատումն է եղել:
-Այո՛, քանի որ այս կնոջ առաջին հղիությունն արհեստականորեն  ընդհատելով մեծացել է ռիսկի գործոնը: Վիժումը կարող է լինել  դեռեւս չծննդաբերած կնոջ հղիությունն ընդհատելու  հետեւանք, եթե այդ դեպքում վնասվել է արգանդի պատի ներսի  շերտը: Հղիության արհեստական ընդհատումից հետո, պահպանելով հղիանալու ընդունակությունը,  շատերն անընդունակ են լինում հղիությունը պահպանել մինչեւ նորմալ  ծննդաբերությունը, եւ սկսվում է անխուսափելին՝ ինքնաբեր  վիժումը:

-Մեր ընթերցողն ուզում է մայրանալ, ի՞նչ կարող է  անել: Ե՞րբ կարող է նորից հղիանալ:
-Ինքնաբեր վիժումից հետո 3-6 ամիս խորհուրդ չի տրվում նորից  հղիանալ, քանի որ մեծ է վիժման հավանականությունը:
Այն կինը, ում  մոտ արդեն տեղի է ունեցել ինքնաբեր վիժում, պետք է անպայման  խորհրդակցի գինեկոլոգի հետ: Բժիշկը, մանրազնին  հետազոտություններ՝ մասնավորապես քրոմոսոմային  հետազոտություն կատարելով վարակներն ու շաքարախտը բացահայտելու համար, վերլուծելով  ապրելակերպը եւ սննդի ռեժիմը, որին կինը հետեւել է հղիության  ժամանակ, կարող է բացահայտել վիժման պատճառը: Այդ  ժամանակ, հետագա հղիության առկայության դեպքում, վերացնելով  դրդապատճառը, կինը կարող է խուսափել բարդություններից: Իսկ որոշ  դեպքերում մինչեւ նոր հղիությունն սկսվելը բժիշկը կարող է  բուժում նշանակել:

-Բժշկուհի՛ Բոզոյան,  ի՞նչ խորհուրդ կտաք այն նորաստեղծ ընտանիքներին կամ պարզապես  զույգերին, որոնք տարբեր գործոններով պայմանավորված չեն ցանկանում շուտ երեխա ունենալ, ինչպե՞ս կանխարգելեն հղիության արհեստական ընդհատումը:
-Առողջությանն անդրադարձող բացասական հետեւանքներից խուսափելու համար նպատակահարմար  է օգտվել հակաբեղմնավորիչ ժամանակակից մեթոդներից: Այս պարագայում խորհուրդ  չեմ տա օգտագործել հորմոնալ պատրաստուկներ եւ ներարգանդային  պարույր: Եթե զույգերը ցանկանում են հետագայում կամ  առաջիկայում ունենալ առողջ երեխա, պետք է օգտվեն ավելի անվնաս  հակաբեղմնվորիչ մեթոդներից: Հուսալի միջոց են տղամարդկանց  պահպանակները եւ կանացի վզիկային թասակիկները:
Պայքարե՛ք, բայց դուրս մի՛ եկեք բնության դեմ:

Հեղինակ՝ Գոհար Թևանյան

Կիսվել
Tweet
Pin
Կիսվել

Հարակից նյութեր

Սեքս և հղիություն
Սեքսը և հղիությունը
Հուլիսի 2, 2014
Խանդոտ ամուսիններ
Խանդում է ու խանդում
Սեպտեմբերի 11, 2014
Ամուսիններ
Անպտղությունն առանց պատճառի չի լինում
Սեպտեմբերի 24, 2014

17 մեկնաբանույթուն

Թողնել պատասխան

Ձեր էլ-փոստի հասցեն չի հրապարակվելու։ Այն նշելը անհրաժեշտ է հետագայում ավելի արագ մեկնաբանություն թողնելու համար։