Թրոմբոցիտներ
Փորձագետի խորհուրդներ

Փոփոխական թրոմբոցիտներ

-Արյան մեջ թրոմբոցիտների տոկոսը շատ ցածր է: Ինչպե՞ս կարելի է բարձրացնել:
Անահիտ, Երեւանից

Թրոմբոցիտները կամ արյան թիթեղիկները կորիզազուրկ գոյացություններ են, որոնց թիվը 1 մկլ արյան մեջ   հասնում է180.000-320.000-ի: Թրոմբոցիտները մասնակցում են արյան մակարդմանը։
Թրոմբոցիտների մասին զրուցեցինք արյունաբան Հեղինե Խաչատրյանի հետ:


Վաճառվում է ՆԻՇԱՍՏԱ
Հեռ.՝ 091-517207

-Ի՞նչ դեր ունեն թրոմբոցիտները մեր օրգանիզմում:
— Թրոմբոցիտները արյան մակարդման համար պատասխանատու բջիջներ են: Դրանք, արյունատար անոթներում  մշտապես շրջանառվելով, փնտրում են անոթի լորձաթաղանթի կամ պատի  վնասված հատված և  գտնելիս սոսնձվում են միմյանց` առաջացնելով թրոմբոցիտար խցան, որից հետո սոսնձվում  են խցանով անոթի պատի համապատասխան հատվածին: Այսպիսով, այս գործընթացը կոչվում է արյան մակարդման առաջնային օղակ, այսինքն` թրոմբոցիտների` միմյանց սոսնձվելու և հետագայում անոթի պատին կպչելու ունակությունը մակարդման կարևոր փուլն է, ինչը կանխում է սուր արյունահոսության վտանգը:

-Ինչի՞ հետևանքով է մեր օրգանիզմում փոփոխվում թրոմբոցիտների քանակը:
-Թրոմբոցիտների քանակը մեր օրգանիզմում փոփոխվում է մի շարք պատճառներով: Դրանք են` քրոնիկական արյունահոսությունները, ուռուցքային հիվանդությունները, ոսկրածուծի ախտահարումով պայմանավորված արյան հիվանդությունները, վարակիչ հիվանդությունները, բորբոքային գործընթացները, վիրուսային վարակները, աուտոիմուն հիվանդությունները, որոշ  դեղորայքի ընդունումը և  հղիությունը:

-Ինչպիսի՞ բարդությունների կարող է հանգեցնել թրոմբոցիտների քանակի փոփոխությունը:
-Թրոմբոցիտների ավելցուկից կարող են առաջանալ անոթներում` արյան փոքր շրջանառության խանգարումներ և  խցանումներ, ավելի լուրջ դեպքերում`  թրոմբոֆլեբիտներ: Քանի որ նախատեսված քանակից ավելի շատ են շրջանառվում,  ֆունկցիոնալ առումով ավելի ակտիվ են, հետևաբար ավելցուկի դեպքում անպայման կիրառվում են հակա-մակարդիչներ, հակաագրեգատներ, իսկ ահա թրոմբոցիտների անբավարար քանակն սպառնում է արյունահոսական բարդություններով` թե՛ լորձաթաղանթներից` քթի, լնդերի, աղիների, միզասեռական ուղիների, և թե՛ խոռոչային արյունահոսություններով, հետևաբար թրոմբոցիտների անբավարարությունը նույնպես հատուկ բուժման կարիք ունի:

-Իսկ ի՞նչ խորհուրդ կտաք մեր այն ընթերցողներին, ում մոտ թրոմբոցիտների քանակը ցածր է:
-Միանշանակ պետք է դիմել բժշկի` պարզելու համար,  թրոմբոցիտների քանակն ի՞նչ պարտճառով է իջել, հետո միայն սկսել բուժումը:

-Ինչպե՞ս կարելի է բարձրացնել կամ իջեցնել թրոմբոցիտների քանակը:

-Թրոմբոցիտների քանակն  ինքնուրույն ավելացնող կամ նվազեցնող միջամտություններ անելը հակացուցված է` բարդություններից խուսափելու համար: Ուստի շատ կարեւոր է նախ պարզել թրոմբոցիտների քանակի փոփոխման պատճառը: Այդ դեպքում միայն կարելի է համապատասխան եւ արդյունավետ բուժում իրականացնել:

-Արդյո՞ք սննդակարգը որոշակի կապ ունի թրոմբոցիտների հետ:
-Սննդակարգից ցուցված են միայն վիտամիններով հագեցած բանջարեղեն ու մրգեր:

Թրոմբոցիտները ոչ ճիշտ ձև ունեցող, հարթ, անգույն մարմնիկներ են, որոնք շրջանառվում են արյան մեջ` ապահովելով նրա մակարդումը: Ինչպես  նշեց բժիշկը, բուժման կամ խորհուրդներ տալու համար շատ կարեւոր է նաեւ պարզել թրոմբոցիտների քանակի փոփոխման պատճառները: Պետք է բուժել հիմնական հիվանդությունը: Ուստի, հարգելի Անահիտ, պատճառը պարզելուն պես խնդրում ենք դիմել “Տնային առողջարանի” խմբագրություն: Իսկ եթե Ձեզ մոտ թրոմբոցիտների ավելցուկը կամ պակասը կապված է ընդունած դեղորայքի հետ, ապա դիմեք Ձեզ բուժող բժշկին:

Հեղինակ՝  Մարիամ Հովունի

Թողնել պատասխան

Ձեր էլ-փոստի հասցեն չի հրապարակվելու։ Այն նշելը անհրաժեշտ է հետագայում ավելի արագ մեկնաբանություն թողնելու համար։