Մաշկի անցանկալի հյուրերը

Գեղեցիկ և առողջ մաշկ  ունենալու համար շատ կարեւոր է  այն մշտապես խնամելը: Սակայն լինում են նաև դեպքեր, երբ  անգամ հետեւողական լինելը չի օգնում, և այդուամենայնիվ   մաշկի վրա հայտնվում են բշտիկներ:

Ի՞նչ անել բշտիկների դեմ պայքարելու համար. այս և այլ` “Տնային առողջարանի” ընթերցողներից ստացած հարցերի պատասխաններ մենք փորձեցինք ստանալ բժիշկ-կոսմետոլոգ  Աղավնի Խաչատրյանից:

-Ի՞նչը կարող է դեմքի վրա  բշտիկների առաջացման պատճառ լինել:
-Դեմքի կորյակները սովորաբար առաջանում են սեռահասունացման տարիքում, դա օրգանիզմում հորմոնալ փոփոխության դրսևորում կարող է լինել: Կորյակները կարող են առաջանալ նաև հասուն տարիքում, առողջական տարբեր շեղումների հետեւանքով: Դրանք կարող են լինել ներզատիչ, աղեստամոքսային համակարգի հիվանդությունների, գինեկոլոգիական շեղումների դեպքում:

-Փաստորեն,  բշտիկները կարող  են ազդարարել, որ մեր օրգանիզում առողջական խնդի՞ր կա:
-Վերը նշվածից կարող ենք գալ այն եզրակացությանը, որ այո, և, ինչպես ասում են, “մաշկը առողջության հայելին է, աչքերը` հոգու”:

-Հարց ընթերցողից. քթի և կզակի շրջանում նկատում եմ բշտիկներ, ի՞նչ կարող եմ անել, որպեսզի  վերացնեմ  դրանք:
-Բշտիկների առկայության դեպքում ցանկալի է դիմել մասնագետի, քանի որ դրանք կարող են սկզբից արտահայտվել շատ թեթև, իսկ սխալ խնամքի դեպքում` բարդանալ և ավելի դժվար ենթարկվել բուժման: Ինչպես նաեւ պետք է պարզել առաջացման պատճառը: Միակ շատ կարևոր խորհուրդը` չսեղմել դրանք:

-Մաշկի որոշակի   հատվածի բշտիկների առկայությունը կարո՞ղ է լինել ալերգիկ հակազդեցություն:
-Իհարկե, և դրանց դեմ պայքարելու համար շատ կարեւոր է հենց սկզբում պատճառը պարզելը:

-Շատ ժամանակ  մարդիկ այսպիսի դեպքերում  սպիրտ են  օգտագործում, արդյո՞ք   թույլատրվում է, թե՞ ոչ:
-Սպիրտի օգնությամբ մենք կանխարգելում ենք վարակի տարածումը, սակայն մաշկը ենթարկում ենք գերչորացման, որը անդառնալի ազդեցություն է թողնում կնճիռների առաջացման հարցում:

-Եվ վերջում, ի՞նչ խորհուրդ կտաք, ինչպե՞ս պայքարել բշտիկների դեմ:
-Տնային պայմաններում ցանկալի է կիրառել կավե դիմակներ, շատ օգտակար են նաեւ դեղագործական արտադրության հատուկ քսուքները: Տնային պատրաստման քսուքներ ցանկալի չէ կիրառել:
Ինչպես նշեց բժիշկ-կոսմետոլոգը, մաշկն առողջության հայելին է, իսկ աչքերը` հոգու, ուստի փորձենք լինել ուշադիր եւ հետևողական  նաեւ մեր առողջության նկատմամբ, քանի որ բշտիկները կարող են որեւէ հիվանդության մասին “խոսել”: Ուստի պետք է գտնել եւ վերացնել բուն պատճառը:

Հ.Գ.  Շատ արդյունավետ է նաեւ վաղենակի ոգեթուրմը, որը կարելի է քսել բշտիկներին առավոտյան եւ երեկոյան, իսկ եթե Ձեր մաշկը չոր է, այն կիրառելուց հետո օգտագործեք սնուցող եւ խոնավեցնող քսուքսներ: