Փոքրիկիս մոտ փորկապություն է

— Իմ նորածին փոքրիկը  փորկապություն ունի: Նշեմ, որ արհեստական է սնվում: Ինչի՞ հետ է դա կապված, ինչպե՞ս օգնեմ նրան:
Լուսինե

Փորկապությունները հաճախ են ուղեկցում նորածիններին, եւ որքան էլ ցավալի է, բայց փոքրիկների մոտ գոնե մեկ-մեկ հանդիպում են արտաթորման հետ կապված խնդիրներ:
Փորկապությունը կարող է ունենալ մի շարք պատճառներ, բայց ամենահիմնական պատճառներից են արհեստական կերակրման հետևանքով առաջացող փորկապությունները: Ուստի պատահական չէ, որ բոլոր մասնագետները միաձայն պնդում են՝ կրծքի կաթը լավագույն սնունդն է երեխայի համար:

Երբեմն փորկապության կարող է հանգեցնել նույնիսկ արհեստական կերի տեսակի փոփոխումը: Մայրիկը պետք է նաև համոզված լինի, որ փոքրիկն ստանում է իրոք լավ, որակյալ ու համապատասխան սնունդ: Ծննդաբերությունից հետո երեք օրվա ընթացքում նորածնի մոտ առկա է ոչ թե կեղտ, այլ նորածնային արտաթորանք, որը  սովորաբար լինում է ծնվելուց հետո առաջին մի քանի ժամվա ընթացքում: Կղանքի բացակայությունը  կարող է հուշել, որ սնունդը երեխային չի բավականացնում, և նա վատ է սնվում:
Եթե փոքրիկը կյանքի առաջին երեք ամիսներին կղում է օրական  1-2 անգամ կամ ավելի հազվադեպ, դուք պետք է խորհրդատվության համար դիմեք մանկաբույժի: Արհեստական սնունդ ընդունող երեխաները պետք է արտաթորեն օրական առնվազն մեկ անգամ:

Եթե փոքրիկը պարբերաբար ունենում է արտաթորման խնդիրներ, դա արդեն քրոնիկական փորկապության նշան է: Եթե փոքրիկն իրոք տառապում է քրոնիկական փորկապությունից, նրա կղանքի ծավալը մեծանում է: Փորկապության ժամանակ փոքրիկների մոտ նկատվում է նաև ոչ միայն կղանքի բացակայություն, այլև ցավեր որովայնում, ախորժակի բացակայություն: Սակայն, եթե երեխայի մոտ նկատվում են կղանքի հետ կապված խնդիրներ, փորկապություն ախտորոշումը տալուց առաջ հարկավոր է բացառել այնպիսի հիվանդությունները, ինչպիսիք են հիպոթիրեոզը,  ռախիտը, որոնք նույնպես դժվարեցնում են արտաթորումը:

Եթե փոքրիկն արհեստական սնունդ է ընդունում, հարկավոր է ուշադրությամբ վերահսկել ամեն ինչ: Պետք է շատ մեծ պատասխանատվությամբ մոտենալ կերի ընտրությանը, ծծակի չափսին ու նրա վրա եղած բացվածքներին: Ամենափոքրիկ սխալը կամ սխալ ընտրությունը կարող են հանգեցնել նրան, որ արհեստական սնունդ ընդունելու ընթացքում փոքրիկի մոտ սկսվի փորկապություն:
Նորածին երեխայի համար շատ կարևոր է կերի ընտրությունը: Ճիշտ կեր ընտրելու դեպքում դուք կկարողանաք խուսափել նման խնդիրներից: Կերը ճիշտ ընտրելու համար դիմեք մանկաբույժի, իսկ գնելիս ուշադրություն դարձրեք պիտանիության ժամկետին, նաև հետևեք, որ կերի տարիքային խումբը համապատասխանի ձեր մանկան տարիքին:

Փորկապության  կանխարգելումը

Ինչպես արդեն նշեցինք, փորկապության պատճառներից մեկը կարող է լինել թերսնումը, որի ժամանակ նկատվում է նաև մարմնի զանգվածի նվազում: Դրա համար էլ հետևեք երեխայի ընդունած կերի ծավալին՝ նրա աճին համընթաց ավելացնելով այն:

Հարկավոր է նաև երեխային մերսելու զարգացնող վարժություններ կատարել:

Փորկապության դեպքում առաջին հերթին հարկավոր է մերսում կատարել: Ձեր ձեռքով կոկիկ շարժումներով սկսեք ժամացույցի սլաքի ուղղությամբ մերսել երեխայի որովայնը: Կարելի է նաև ձեռքը բռունցք արած վիճակում կատարել:

«Հեծանիվ» վարժությունը թույլ է տալիս խթանել աղիների աշխատանքը:

Լողացնելուց բացի, փոքրիկի համար տաք լոգանքներ կազմակերպեք: Երեխային տասը րոպեով ընկղմեք տաք ջրի մեջ, ջրում կարող եք երեխայի հետ նույնիսկ որովայնի վարժություններ կատարել: Դրանից հետո երեխային սրբիչով չորացրեք ու մանկական յուղ քսեք մաշկին:

Աղիների գործունեության ակտիվացմանն օգնում է «փորի վրա պառկած» դիրքը, և հենց այդ պատճառով էլ բժիշկները խորհուրդ են տալիս  օրական մի քանի անգամ փոքրիկին մի քանի րոպեով պառկեցնել փորի վրա:

Եթե երեխան շարունակում է ուժեղ ճիգեր գործադրել, փորձեք նրան պահել զուգարանակոնքի վրա: Փոքրիկի մեջքը սեղմեք ձեր փորին,  ոտքերը ծնկներից ծալեք և բռնեք ձեր ձեռքերով: Որպեսզի երեխան հեշտ արտաթորի, հետանցքին մանկական քսուք կամ վազելին քսեք:

Այս բոլոր միջոցառումներն անպայման կնպաստեն խնդրի լուծմանը: