Ինչո՞ւ է բորբոքվում միզապարկը

— Ի՞նչ անել միզապարկի քրոնիկական բորբոքման դեպքում, եթե  հակաբիոտիկները  չեն օգնում:
Անուշ:

21 -րդ դարի մարդուն մտահոգող հիվանդություններից մեկը  համարվում է միզապարկի բորբոքումը (ցիստիտ), որը հանդիպում է բնակչության 50-60 տոկոսի  մոտ՝ միջին տարիքում:
Ցանկանալով պարզել այս հիվանդության առաջացման պատճառները եւ բուժման մեթոդները՝ դիմեցինք բժիշկ- ուրոլոգ Մուշեղ Վարազդատի Մկրտչյանին:

— Բժի՛շկ Մկրտչյան, ինչպիսի՞ հիվանդություն է միզապարկի  բորբոքումը:
-Մարդու ամենակարեւոր օրգաններից մեկը համարվում է միզապարկը:  Այն մկաններից կազմված օրգան է, որը  տեղավորված է փոքր կոնքի շրջանում: Միզապարկի բորբոքումը բարդ  եւ երկարատեւ բուժվող գործընթաց է: Այս հիվանդությանը հատուկ է շատ արագ  վերափոխումը քրոնիկականի:

-Որո՞նք են միզապարկի բորբոքման առաջացման  պատճառները, եւ հատկապես ո՞ր տարիքում է այս հիվանդությունն  իրեն զգացնել տալիս:
-Հիմնականում միզապարկի բորբոքման  պատճառներից  առաջինը համարվում է մրսածությունը, սակայն բորբոքում կարող է  առաջանալ տարբեր վարակներից, միզասեռական համակարգի եւ հորմոնալ խանգարումներից:
Միզապարկի բորբոքումն առաջանում է միջին տարիքում եւ ավելի հաճախ կանանց մոտ: Այն կարելի է դասել  կանացի հիվանդությունների շարքին:

—Ինչպե՞ս է բուժվում միզապարկի բորբոքումը:
-Առաջին հերթին մասնագետը, լսելով հիվանդի գանգատները,  նշանակում է մեզի լաբորատոր հետազոտություն եւ սոնոգրաֆիա: Այնուհետեւ,  կախված հետազոտության արդյունքներից, հիվանդության բարդության աստիճանից՝  նշանակում է համապատասխան հակաբիոտիկներ, միզամուղներ,  ցավազրկողներ:

—Եթե փորձենք փոքր-ինչ օգնել մեր խմբագրություն դիմած  ընթերցողին, ապա ի՞նչ խորհուրդ կտաք, ինչպե՞ս պետք է նա  բուժվի, եթե հակաբիոտիկներն արդեն չեն օգնում եւ  հիվանդությունն էլ դարձել է քրոնիկական:
— Երբ միզապարկի բորբոքումը դառնում է  քրոնիկական, ապա դրա բուժումը բավականին բարդանում եւ երկարաձգվում է: Եթե բուժվելուց հետո միզապարկի  բորբոքումը կրկնվում է, ապա դա կարող է մի  քանի պատճառներից լինել: Առաջնային պատճառ  համարվում է այն,  որ հիվանդը բուժվելուց հետո իրեն լավ չի խնամում՝ տաք չի  հագնվում, անընդհատ սառը ջրի հետ է գործ ունենում, նշանակված  դեղորայքը ճիշտ եւ ժամանակին չի օգտագործում, սառեցնում է իրեն: Ինչպես նաեւ միեւնույն հակաբիոտիկի երկարատեւ օգտագործման դեպքում օրգանիզմը “սովորում” է դրան, եւ հետեւաբար բուժամիջոցն առաջվա պես չի ազդում:
Միզապարկի  բորբոքման կրկնվելու պատճառը շատ հաճախ լինում է սխալ  նշանակված բուժման կուրսը, որն էլ ավելի է խորացնում հիվանդի  վիճակը: Հիմնականում կրկնվելու դեպքում բուժումը կատարվում  է հիվանդանոցային պայմաններում: Նշանակվում են  հակաբորբոքայիններ, ինչպես նաեւ ժողովրդական լեզվով ասած՝  տոկեր, միզամուղներ եւ համապատասխան սննդակարգ: Կրկնվելու  դեպքում թե՛ հիվանդը եւ թե՛ բժիշկը պետք է աչալուրջ եւ  հետեւողական լինեն, որպեսզի հիվանդությունը լիարժեք բուժվի եւ չառաջացնի   լուրջ  հետեւանքներ:

—Հարգելի՛ բժիշկ, ի՞նչ խորհուրդ կտաք զրույցի վերջում:
-Մեր հայ կանանց եւ աղջիկներին խորհուրդ եմ տալիս հագնվել  եղանակին համապատասխան եւ փորձել փոքր-ինչ մրսածությունից  զերծ մնալ, որովհետեւ չնչին մրսածությունը կարող է հանգեցնել  նմանատիպ բարդ հիվանդությունների: Բոլորին ցանկանում եմ  առողջություն: