Սթրես
Հոգեբանություն

 Սթրեսը՝  հիվանդությունների պատճառ

Սթրեսը բազմաթիվ հիվանդությունների պատճառ է հանդիսանում։

Դրա մասին շատ ենք լսում, բայց լսելը մի բան է, իսկ իրականում սեփական փորձով բախվելը՝ բոլորովին այլ։
Իրականում շատ բան կախված է մարդու խառնվածքից: Սթրեսը յուրաքանչյուրի մոտ տարբեր դրսեւորումների պատճառ կարող է դառնալ՝ դեպրեսիայի, վախի կամ ներքին օրգանների որեւիցե հիվանդության:


Վաճառվում է ՆԻՇԱՍՏԱ
Հեռ.՝ 091-517207

Խոլերիկների մոտ սթրեսը հաճախ քողարկվում է սիրտանոթային հիվանդություններով, ինչպիսիք են՝ արյան բարձր ճնշումը, կաթվածներն ու տասներկումատնյա աղիքի խոցը: Սթրեսն  ունակ է առաջացնել շաքարախտ, նևրոզ, դաշտանի խանգարում, հորմոնալ խանգարումներ, տեսողության վատացում և այլն։
Սթրեսն օրգանիզմի եւ մարդու հոգեկանի լարվածությունն է, որն առաջանում է ներքին եւ արտաքին գործոնների՝ սթրեսորների ազդեցության տակ: Սթրեսորները լինում են ե՛ւ տհաճ, տառապանք պատճառող, ե՛ւ հաճելի:
Տհաճ սթրեսոր է, օրինակ, բարձր ջերմաստիճանը, որը մարդուց եռանդ է խլում եւ թույլ չի տալիս նորմալ ու արդյունավետ աշխատել:

Հաճելի սթրեսներ մենք ապրում ենք այն ժամանակ, երբ, օրինակ, լավ աշխատանք ենք գտնում, տեղափոխվում ենք նոր բնակարան, ձեռք ենք բերում այնպիսի առարկաներ, որոնք մեզ համար շատ ցանկալի են եւ այլն: Դրանք, անկասկած, հաճելի իրադրություններ են, բայց, գումարվելով, կարող են հանգեցնել օրգանիզմի ֆիզիոլոգիական եւ հոգեբանական գերլարվածության: Այդպիսի վիճակի նշաններից են զարկերակային բարձր ճնշումը, գլխացավերը, անհանգստությունն ու որեւէ աշխատանքի վրա ուշադրությունը կենտրոնացնելու անընդունակությունը եւ այլն:

Սթրեսորների հիմնական տեսակներն են՝ առօրյա կյանքի փոքրիկ տհաճությունները (վեճեր, բախումներ, կռիվներ, բամբասանքներ եւ այլն), ցավերն ու անհարմարավետ վիճակները, կոնֆլիկտներն ու այլ դրդապատճառներ, շրջակա միջավայրի գործոնները:
Այդ բոլոր տհաճ իրադրությունների եւ խնդիրների դեպքում մարդն ունենում է այնպիսի հոգեբանական ախտանշաններ, ինչպիսիք են` նյարդայնությունը, շտապողականությունն ու տագնապախռովությունը, գործերն արդյունավետորեն առաջ մղելու անընդունակությունը, թախիծն ու դառնացածությունը, միայնության ու լքվածության զգացումը եւ այլն:

Կյանքի պայմանների փոփոխություններ՝ սթրեսորներ
Կյանքի փոփոխություններն առօրյա կյանքի տհաճություններից տարբերվում են առնվազն երկու առանձնահատկությամբ.
ա) Դրանք կարող են լինել ե՛ւ տհաճ, ե՛ւ հաճելի իրադարձություններ.
բ) Այդ փոփոխություններն ամենօրյա երեւույթներ չեն: Օրինակ՝ ամուսնանալը, բնակության վայրը փոխելը, հարազատին կորցնելը եւ այլն:
Ինչպես առօրյա կյանքի տհաճությունները, այնպես էլ լուրջ փոփոխությունները, հանգեցնում են ոչ միայն հոգեվիճակների, այլեւ ֆիզիկական առողջության վատացմանը: Կյանքի դրական փոփոխությունները եւս կարող են վնաս պատճառել առողջությանը:

Իմանալով այս ամենը` սիրելի՛ ընթերցողներ, եկեք սովորենք վերահսկել մեզ, հետաքրքիր եւ բովանդակալից դարձնենք մեր օրը, ապրենք բնության օրենքներին համահունչ, ջանանք  բնական միջոցներով ամրապնդել մեր օրգանիզմը:
Դրականորեն տրամադրվենք, եւ այդժամ գուցե այդքան խոցելի չենք լինի եւ կկարողանանք արժանի հակահարված տալ սթրեսին:

«Տնային  Առողջարան»

Թողնել պատասխան

Ձեր էլ-փոստի հասցեն չի հրապարակվելու։ Այն նշելը անհրաժեշտ է հետագայում ավելի արագ մեկնաբանություն թողնելու համար։